Ilinniartitaanermi tunngaviatigut peqqinnissamut, nerisaqarnermut nerisassiornermullu tunngassuteqartut. Nerisassat akulersornissaat taamatullu najugassat pillugit ilimaarinnilersinneqassaatit. Aamma kiffartuusilluarnissaq ilinniassavat, taamatullu suleqateqarlutit suliaqarneq ilinniassallugu.

Ilinniarnerit gastronomassistentitut, cater imal. kantineassistentitut igasutulluunniit naamassisinnaavat.

• Gastronomassistenti: Neriniartarfiit iggaviini nalinginnaasumik suliassat isumaginissaanut ilinniartinneqassaatit.
• Cater- og kantineassistenti: Kanitiani nerisassiornissaq sallaasiisarnerlu ilinniassavat.
• Igasoq: Nerisassiornermi atugassanik pisiniarnissamut, paarinissaanut piareersaanissamullu ilinniartinneqassaatit. Igariaatsit assigiinngitsut sunillu akoqarsinnaanerat pillugit taamatullu imeruersaateqartitsinissaq pillugit ilinniartinneqassaatit.

Takuss. 1-mi takuneqarsinnaavoq igasutut ilinniarneq 3-nut avinneqarsimasoq, tassa arlaat naamassigukku unikkallarsinnaavutit. Ukiut 2-t ingerlanerini gastronomassistentinngorsinnaavutit, ukiut 2½ ilinniareeruit cater- aamma kantineassistentinngorlutit taamatullu ukiut 4-t ilinniareeruit igasunngorsinnaallutit.

Ilinniartitaaneq tunngaviatigut pingaarnermilu tulleriillugit ingerlanneqartussaavoq, akornatigut suliffinni sungiusaatigalugu ilinniartuusinnaallutit. Inuilimi tunngaviatigut marloriarlutit sap.ak. 10-t ilinniartuusassaatit. Pingaarnerup ingerlanera 3-ngorlugit agguagaavoq: Gast 1, 2 aamma 3, assigiinngitsunik sivisussusillit, taakkua Inuilimi taavalu TechCollege Aalborgimi ingerlanneqassallutik.

Takuss’ 1.

Ilinniartitaaneq imatut aaqqitaavoq, gastronomassistentitut aallartikkuit taava kingorna cater-/kantineassistentitut ilinniarsinnaavutit imal. igasutut ilinniarlutit.

Aamma saqisutut ilinniarnerit nangissinnaavat.

Ilinniarfinniinnerit

Ilinniarfinni atuarnerit Inuilimi aamma TechCollege Aalborgimi ingerlanneqassapput:

Inuilimi:

• Tunng. 1: sap.ak.10-t
• Tunng. 2: sap.ak.10-t
• Gastr. 1: sap.ak. 12-t
• Gastr. 2 + soraarumm.: sap.ak.3-t

TechCollege Aalborgimi:

• Gastr. 2: sap.ak. 10-t
• Gastr. 3 + soraarumm.: sap.ak. 7-t

Fagi

Ilinniarfinni makkuninnga ilinniassaatit:

• Tuluttoorneq
• Tuniniaaneq kiffartuussinerlu
• Ineriartortitsineq aallartitsinerlu
• Inuussutissalioriaatsit
• Iggavinni sulineq
• Akiligassat naatsorsuinerlu
• Pisiassat pillugit ilisimasassat
• Suliffigissaaneq
• Tunisass.ineriartortitsineq
• Nerisitsinerni periutsit
• Nerrivilioriaatsit
• Nerisitsinerni sanariaaseq najugassallu

Ilinniarfinni oqaatsit

Ilinniarnermi atuagassat danskisut allaqqapput, aamma danskisut atuartinneqarnerusassaatit. Cater/kantineassistentitulluunniit naamassiniaruit, taava kalaallisut soraarummeersinneqarnissat qinersinnaavat.

Sungiusaatigalugu sulineq

Sungiusaatigalugu sulininni ilinniassavatit fagimut tunngassuteqartut. Sungiusaatigalugu sulinerit suliffimmi akuerisaasumi pissapput, aamma Inuilimi ingerlatsisoqarsinnaalluni. Igasutut naamassinialeruit soraarummiissaatit ”svendeprøveqarlutillu”. Taanna TechCollege Aalborgimi naggataarutaasumik atuarnermut tunngatillugu pissaaq.

Tunngaviatigut ilinniartunngorniaruit, meeqqat atuarfiat naamassinikuusimasariaqarpat. Taamaassimassaaq soraarummeeruteqarlutit naamassisimagukku imaluunniit assingusumik tamatuma kingorna ilinniagaqarsimaguit.

Tunngaviatigut ilinniartunngussaguit piumasaqaatit

10. klassimiit assingusutigulluunniit soraarummeerninni kalaallisut, danskisut matimatikkimilu soraarummeernermi minnerpaamik agguaqatigiissillugu E/02 angunikuusimassavat.

Tamatuma saniatigut sungiusaatigalugu ilinniartuunissamut suliffeqarfimmik isumaqatigiissuteqarsi-maguit, ilinnialernissamut piumasaqaatit naamassisimassavatit.

Pingaarnermi ilinnialersinnaavutit

Pingaarnermi ilinnialernissamut aamma piumasaqaatitaqarpoq. Tassani ilinnialernissamut piumasaqaataavoq tunngaviatigut ilinniarnerup aappaani immikkut projekt-itut suliaq naamassisimassagit, aammalu fagit ukua angusiffigisimassagitit:

• Paasititsiniaasarnermi teknogi, F-i angusimassallugu
• Avatangiisilerineq, F-i angusimassallugu

Tunngaviatigut ilinniartuuninni – pingaarnerup aallartinnginnerani – periarfissaqassaatit makkunuuna allagartartaarnissamut:

• Nalinginnaasumik nerisassiornermi eqqiluisaarneq
• Ikiueqqaarneq
• Ikuallattuulernermi qamiterineq.

Peqataanissamut piumasaqaatit

Matumuna ilinniartuusimanerit iluaqutigalugu pisinnaasaqarfigilersimassavat:

• Aamma ulapaarfiusuni aaqqissuussillaqqittuussaatit
• Tamalikaartoq, assassullaqqissorlu
• Eqqiluisaarneq soqutigisarissavat
• Nammineerlutit allallu suleqatigalugit sulisinnaassaatit
• Piffissani assigiinngitsuni sulisarnissat piareersimaffigissavat
• Pitsaassutsit sumininnguanullu tappissuseqarneq
• Kiffartuusserusunneq
• Ujartuillaqqissoq

Igasutut ilinnialerusukkuit ukioq kaajallugu qinnuteqaateqarsinnaavutit.

Ilinniarnernut atatillugu sungiusaatigalugu suliffissarsisimaguit, najugaqarfinni Majoriamut saaffiginnissaatit. Majoriap ilinniartutut isumaqatigiissusiorninni ikiussavaatit. Taanna illit ilinniarfissarpillu atsiussavarsi, atsiorneqareerpallu Inuilimut nassiunneqassalluni. Tamatuma kingorna atuariartornissamut aggersarneqarumaarputit.

Ukiup ingerlanerani qaqugukkulluunniit ilinniartunngorsinnaavutit.

30-nik ukioqalereersimaguit inersimasutut ilinniartunngorniarsinnaavutit.

Ilinniarninni sungiusaatigalugu suliffissarsisinnaanngikkuit, Inuilimi tamatuma ingerlassinnaanissaanut periarfissaqarputit. Taamaasiorniaruit aamma Majoriaq aqqutigalugu qinnuteqaateqarsinnaavutit.

Ilinniartitaaneq akeqanngilaq. Ilinniartup sungiusaatigalugu ilinniarfimmilu ilinniartuunermini ilinniartutut akissaateqassaaq. Ilinniartutut akissarsiassat sulisitsisussarpit soqutigisaqaqatigiiffippillu akor-nanni isumaqatigiissutigineqartarpoq.  Ineqarnernut akilitigisartagaqarsimaguit ilinniarfimmiinnerni taassumunnga akiliunneqartarnissat qinnuteqaatigisinnaavat. Ilinniartuunersiuteqarniarlutit qinnute-qaateqaruit, aamma meeqqamut tapisiaqarnissaq qinnuteqaatigisinnaavat. Ilinniarnernut tunngatillugu angalanerit, maleruagassat naapertorlugit akilerneqartassapput.

Ilinniarfimmiinnerni ineqarnermut nerisaqarnermullu akiliuteqartartussaavutit.

Alloriarfissani unikkallarnissat qinersimagukku, kingorna ilinniarnernut uteqqissinnaavutit taavalu ilinniarnerit nangeqqillugu.

Igasutut ilinniagaqarsimaguit taava neriniartarfinni, kantiinani, fastfood-inut pisiniarfinni, caféni il.il. suliffittaarsinnaavutit. Nalinginnaasumik suliffeqarfiit ineriartortitsiffiusarput, ilaatigullu sulisutigut allanngorartuusinnaasarlutik.

Suliffeqarfinni sulffissuartut ingerlaaseqartuni aamma igasut atorfissaqartinneqartarput. Ilinniagaq nunani assigiinngitsuni atugaagami sumiluunniit atorneqarsinnaasarpoq.